Xa chega o noso día preferido do ano, o día preferido para esta directora da asociación ecoloxista Néboa Medio Ambiente, e para moitos dos nosos socios e socias, o día 21 de marzo, O DÍA DA ÁRBORE, que por suposto coincide co inicio da primavera. Como educadora ambiental eu empecei o meu andar polo camiño de medio ambiente facendo magníficas plantacións de árbores con alumnos e alumnas dos dous colexios de Neda, os colexios San Isidro e Maciñeira. Xa choveron anos dende aquela! 25 anos nada máis e nada menos, 25 ANOS PLANTANDO ÁRBORES, porque se algo non falta nunca nas programacións anuais de actividades desta asociación son as plantacións de árbores. Onte lin unha frase preciosa que dicía que cada árbore plantada era unha promesa dun futuro máis verde, e esa frase reflexa perfectamente o sentir desta entidade, empeñada en conservar os nosos entornos naturais plantando, renovando as árbores vellas das fragas do Eume, sustituíndo eucaliptos por árbores autóctonas, poñendo árbores que nos dean vida e osíxeno.

Estamos preparando a nosa celebración do Día a Árbore deste ano, mentras tanto, moi feliz Día para todos, se tedes a oportunidade de plantar unha árbore nun pedaciño de terreo, no voso xardín, na finca dos vosos pais, no monte dos avós, nunha propiedade municipal acompañados de outros que coma nós adoramos este día,…. non deixedes de facelo.